اعذريني

اعذريني

تناديني وتحشميني

يزينب گلبي اتفطر

اعذريني لا تشجيني

صريع وجسمي امطبر

********

مِن صاب الحجر راسي

نزيف الدم صبغ شيبي

دم الجبهه حد شوفي

مسحته يختي ابثوبي

يزينب وانكشف صدري

وشطر سَهم العدو اگليبي

جوادي اتخضب ابدمي

طرحني وما دنوا صوبي

على التربان       أظل عريان

يختي ابها الشمس والحر

********

يزينب مالي حيل أنهض

مِن صوابي نزف دمي

سَهم ماخذ ثلث گلبي

تركني على الثرى مَرمي

بَعد كل نصحي والترهيب

أناشد هالعدو اشجرمي

بغض حيدر سَمعت اجواب

وثار أحقاده ابجسمي

نبل وسيوف      عطش ما شوف

وحيد وما له عد الشر

********

يزينب من سمعت الصوت

نسيت اصوابي والعدوان

تركت أنصاري بالحومه

وعِفت أولادي والخوان

ثلاث انهض وگع يختي

وجسمي اتعفر ابتربان

ارجعي للحرم زينب

وطلبي عونة الرحمن

أخوچ حسين        يوفي الدين

يختي والعمر گصر

********

ابكفه ما جنى الظلام

وفعلة حرملة ابكفه

عبدالله العطش ماديه

رِدت يسگوه لو رشفه

يزينب طفلي ما رحموه

ضامي وناشف الشِفه

ضرب عبدالله من نحره

عدوه فاگد الرأفه

صدر لمه      عَطر دَمه

رميته للسَما وما خر

********

يختي اوصيچ سمعيني

أمانه العايله وصبري

شمر يختي تشوفينه

يدوس او بالنعل صدري

يزينب خربي الشيعه

ابضيمچ ولعلي يجري

وصيتي من يشربوا الماي

يلعنوا الظالم ابذكري

ينصبوا اعزاي       زمان الجاي

يشيعه الجائزه الكوثر