آه يبني

آه يبني

عليك الگلب ما شد حمل وانهار

حگى لو بجيتك ليل وانهار

وجرى دمعي عليك ابحور وانهار

ما ردني سهم بالغاضريه

***

عبدالله آه يبني              فگدك امصوبني

آه يبني آه يبني

***

يبني من أشوف أطفال            يندهش مني البال

وافتكر فيك اليال                   وش أملت آمال

يا سلوتي من الآل                 جمره ابوسط دلال

سهم الذي صابك

صوبني من صابك

آه يبني آه يبني

***

يبني من أهز مهدك           أشتم عطر خدك

روحي اسهرت عندك       يل صورة من جدك

گلبي الحمل وحدك           چيف احتمل فگدك

سهم سطا ابجسمك

صوّب دليل أمك

آه يبني آه يبني

***

يبني ابظلام الليل            وجهك ضوى القنديل

مزهر يا نجم سهيل         يا وليدي عني تشيل

خليت دمعي يسيل          واتركت گلبي ابويل

من شاهدت دمك

فارگت روح امك

آه يبني آه يبني

***

من كافلي وداك             ما أملت الگاك

يبني ارحلت بضماك      واشربت فيض ادماك

ما أحتمل فرگاك           روحي اطلعت وياك

أبچي على امصابك

وامسح دما اصوابك

آه يبني آه يبني

***

مثلك يا نور العين         ما ينوجد كل حين

من جاك سهم البين       ما اتگلي صابك وين

دقيت گلب حسين          حگي من أموت اونين

صدر الذي ضمك

چفه شگف دمك

آه يبني آه يبني

***

من جابك العطشان           مدّك على التربان

يبچي على الشبان            جف مدمع النسوان

من فگدت الوليان            گلب أمك الوجعان

ينزف من اصوابك

بس انظر اترابك

آه يبني آه يبني