يَعمه مصاب
يعمه مصاب داهينا
مُهر الوالي رد لينا
خالي والسرج مايل
خضب بدموم عرنينه
********
يَعمه صوت بالميدان
مچبل گاصد الصيوان
الوالي مِيّة الرحمن
وحده ايچاتل العدوان
ثلة أيام ظل عطشان
گلبه يشتعل نيران
أخافن صافح التربان
مُهر الوالي رَد لينا
********
جواد حسين يا عمه
اجانا امخضب ابدمه
بجوره بالحرم لمه
نروح المعركه ابهمه
لحامينا ونظل يمه
ندوي اجروحه وانلمه
فداه الروح أبو اليمه
مُهر الوالي رَد لينا
********
فرّت زينب اتنادي
يَسكنه اتزلزل افادي
أخيّ عوني وسنادي
حياتي ومشربي وزادي
عزيزي وضنوة الهادي
گال اتكفلي اولادي
ابعيني أظلم الوادي
مُهر الوالي رَد لينا
********
يَعمه للمعاره انروح
نشوفه بيا كِتر مطروح
ضامي والگلب مجروح
دمه ابكربلا مسفوح
فارگ لو بنزع الروح
نبچي لو نداوي جروح
تفدي ابن البتول الروح
مُهر الوالي رَد لينا
********
يَسكنه اتفطر الدلال
غريبه وما بگى لي ارجال
نروح المعركه ابهلحال
عَليمن تترك الأطفال
وما بيها الخيم خيال
وعلمچ هالجنود أنذال
ابعينه وشنشوف أهوال
مُهر الوالي رَد لينا
********
يعمه تطلع العيله
رباب وعاتكه وليله
نِطب الحومه وانشيله
أخاف من العدو الغيله
نِحشم حيدر ايجي له
يدافع هالعدو وخيله
ويحوط اخيامنا الليله
مُهر الوالي رَد لينا