خيمنا ابهالمسية تزهر بكل عزوتي

خيمنا ابهالمسية تزهر بكل عزوتي
وباجر من يولي الليل … على اخيمنا تغير الخيل
وتضيع امعزتي

لفاني الليل بالوحشة وذهل مني الفكرْ … شجاني و نار حسباتي بقلبي موجّرة
أحوم امدوهنة وأحجي لنفسي بالخدرْ … سواد الليل هذا ابجوفه شللي يضمره
أصعّد بالحزن أنفاسي و انظر للكمرْ … أشوفه منخفت ضيّه و شاحب منظره
و بلطناب … شجتني حرم مفزوعة و ابجاها بهضني
و دمعي … سجبته اعله خدي و هايمة ابنوبات ظني
ذِكرْتِ امن المدينـة طلعتي بمعزّتي … طْلَعِتْ بالصّون مهيوبة الجناب وْيه الحرم
وبني هاشم تداريني و حولي أخوتي … فـلا شفت المذلـّة ولا تدنـّاني هضم
إذا العبـاس اخويـه ملتزم ابخدمتي يجيني امنين خوف وصوبي شيّال العلم
وخدري … تحوطه … بهاليل العشيرة بـالصوارم
وهالليل … ابظلامه … بخيمنا تزهر بدور الهواشم
***************
وْلكنِ اعلينه أشوف اجتمعت العسكرْ
خيل وجنود وسيوف امجلجلة ابهالبرْ
ترست الوادي وعلينه اتحزّمت بالشرْ
وحـامت طيور المنية وبـالي اتحيّرْ
***************
وعندي بالصياوين … تِون النساوين
وجم طفل و طفلة … دمعهـا تهمله
تنـادي يعمـّة … ابستر هاي الظلمة
تكوضوا ابظعنّا … نِرد لوَطنـّـا
العدى ترستْ البيد … إجت منا شتريد
وهالليل لكشرْ … بِده ينذر ابشَرْ
***************
حرم متصوّبة و أطفالْ  … إجتني تشكي عندي الحالْ
و زادت حرقتي
خيمنا ابهالمسية تزهر بكل عزوتي

يخوية امن المدينة اقطعت وياك الدرب … لزمت اوياك نفسي من حدينـا ابهالظعن
و تركت ديار اهلنه وجيت لديار الغرب … وانا ادري هـالسفر مختوم بهموم ومحن
أنا احزام الوفه الزمته وطويته اعله القلب … أنه الما بعِتْ خوّة ولا خِنِتْ عشرة زمن
وهالليل … بلطفوف أعوفك خوية لا ما ترضى نفسي
يبو اليـ … ـمة دربي لـَزِم دربك لون لسنين تـقسي
يسبط الصطفى وأقســم اليك بخـوّتي … إذا العـاشر إجة ودارت رحاها الموزمة
أشدّ الخيل و الرايـة أزمهـا بيـسرتي … و على الكاع ابدمه العدوان اسطر ملحمة
أنه اعله الخيل بـالحومة أكـرّ بصولتي … وسن الرمح بيدي يخرط اعنـان السمة
وحقك … يخوية لخلي امن الدمـة تتلاطم بحـور
ولا يهـ … ـمني دمي إلك عمري اعله شين وزين منذور
******************
شنهو لو مني يخـوية انقطـعت الجفين
شنهو لو لعمود يفـضخ هـامتي نصين
شنهو لو نبلة عدو باجر عمت لـي عين
مو لجل نصر العقيدة ولجل خوية حسين
******************
ألم نبلة العين … ما يهمني يحسين
اللي يمرد حشاي … من يصوبوا الماي
امواعد آنه أطفال … ليهم أجلب ازلال
واليفطر جبدي … حالتك من بعدي
قلـّه خوية عباس … آه يرفعة الراس
كفو ونعم الأخوّة … بسّك امن النخوة
يبو النفس الرفيعة … وانته بالشريعة
  أنْدِبك يذخري …  انكسر خوية ظهري

و انادي يالحِمَلتِ الواي  … يخوية اشمِتَتْ مني اعداي
يسيفي و رايتي
خيمنا بهالمسية تزهر بكل عزوتي
وباجر من يولي الليل … على اخيمنا تغير الخيل
وتضيع امعزتي