وصية علي ع لأم البنين

وصية علي ع لأم البنين 
بأن تذكّر العباس بالوصية
الحسين ع و زينب ع


يَمّ لبنين وصيه يمّ لبنين
ذَكرِي العبّاس ابزينب و لحسين 

بعد عيني وصيه لا تخليها
إلى العباس أبو فاضل تذكريها 
على اچفوفه او على عينه تكتبيها 
ونا أدري الگمر والله كفوا بيها
يمّ لبنين او كلما له تنظرين
ذكري العبّاس ابزينب و لحسين

وذا ركّب لزينب و گصدوا باچر 
أراضي كربلا لعركة العاشر 
وذا گالت أبوفاضل يگل حاضر
او گلبه اعلى الأخو خليه يظل ساهر
يمّ لبنين او بتّاره باليمين
ذكري العبّاس ابزينب و لحسين

قسم قسمي عليه ابلبن شربنّه
أخوك أبو علي لا يبگى بالمحنه
ابخياله روحي له او طلبي يذب عنّه
أبوسكنه يضمّه من تحت جفنه
يمّ لبنين او لو گطعوا له چفين
ذكري العبّاس ابزينب و لحسين

ترجّي بوالفضل أو هلّي العبره 
ليبگى بوعلي مرمي على الغبره 
و لا يگرب شمر منّه يحز نحره
و لا إيخلّي الخيول إجي او ترض صدره
يمّ لبنين و يرّوي گلب لحسين
ذكري العبّاس ابزينب و لحسين

بعينه اللي بگت و السهم ما جاها 
على زينب يظل و بعينه يرعاها
او يمشي بوالفضل بالضعن وياها
او لو حتى بلا چفين يبراها 
يمّ لبنين او يمسح دمعة العين
ذكري العبّاس ابزينب و لحسين

تخبرين الشهم ودري بعد يزعل
فلا يوصل لزينب أجنبي يقبل 
و لا سوط ابمتنها مدري يتحمّل
او ذكري بوالفضل ابزينب اتكفّل
يمّ لبنين أو لو فضخوا له لجبين 
ذكري العبّاس ابزينب و لحسين

إذا طاح الجسد و الهامه فضخوها
تحامي ارويحته عنها لا يسبوها 
او خِمار الزهرا منها لا يسلبوها 
متتحمّل عِداها لين اِسبُّوها 
يمّ لبنين يدخلوها الدواوين
ذكري العبّاس ابزينب و لحسين

يودي اعبايته ويا العلم لخته 
و يغطي بالعلم راس الأخو ابطشته
و يغطي بالعبايه اعيون حگ اخته
لتنظر حگ أخوها تنضرب شَفتَه 
يمّ لبنين او يستر للنساوين
ذكري العبّاس ابزينب و لحسين
@@@@@@@
أبو فراس الحمراني