تنظريني مرتين لوني مثل الدم حزين
أبچي مرّه على حيدر و ابچي مرّه اعلى الحسين
&&&&&&&&
يوم حادي رمضان اشلون يا زينب أوّن
من تنظريني تشوفي دمعتي ويّا الحزن
و انكتب فوگي بعد أيام يرحل بو الحسن
ساعد الله اگليبچ الفاگد على كل المحن
و انعى حيدر بالونين و آنه ويّا المؤمنين
أبچي مرّه على حيدر و ابچي مرّه اعلى الحسين
&&&&&&&&
او يوم حادي من محرّم أنظرچ فوگ الجمل
و الذي يحديچ زينب عين او چف أبو الفضل
و انظرچ يمدلّله و احسين حگ ظلچ يظل
و انتي اتطلبين منّي بالفجيعه لا تهل
فوگ خدّچ دمعتين و انتي ليّه اتعاتبين
أبچي مرّه على حيدر و ابچي مرّه اعلى الحسين
&&&&&&&&
يوم أطلع في شهر الله تدگين الصدر
و يروح حمّاي الحمه منّچ او راسه يزينب منطبر
زينب اتشوفين لوني لون دمه المنفجر
و شوف گلبچ يالوديعه على حيدر منفطر
و انتي ليه اتودعين او تلطمين اعلى الجبين
أبچي مرّه على حيدر و ابچي مرّه اعلى الحسين
&&&&&&&&
آه يهلال المحرّم من تناديني ابألم
عينچ ابوسطي تشوف احسين و بگلبه السهم
و الصدر بالأعوجيه آه وا ويلي انهشم
و النحر منحور وانتي امسلبه ويّا الحرم
امن الشريعه تسمعين صوت مگطوع اليدين
أبچي مرّه على حيدر و ابچي مرّه اعلى الحسين
@@@@@@
أبو فراس الحمراني
... نسألكم الدعاء ...