يا سفينة النجاة
***************
وحق الزاجيه أمك ياللي منسفك دمك
واجبنه نصيح اليوم نندب آه يا مظلوم
***************
من طاح الشهيد حسين ودمه سال لجل الدين
نصبنه ماتمه معزين نلطم دوم بالأيدين
واجبنه نصيح اليوم نندب آه يا مظلوم
***************
علينه زادت الأحقاد من نحيي عزه الأمجاد
ما نخشى من الأوغاد بنواسي علي السجاد
واجبنه نصيح اليوم نندب آه يا مظلوم
***************
شمر الخنه حز الراس ومنك خمد الأنفاس
وآمر بن سعد الأرجاس بخيول العده تنداس
واجبنه نصيح اليوم نندب آه يا مظلوم
***************
نار الحزن تلهبنه حب حسين في دمنه
مصاب حسين ذوبنه شيعه وهذا واجبنه
واجبنه نصيح اليوم نندب آه يا مظلوم
***************
طول العمر ما ننساك ياللي تخضبت بدماك
كل أرواحنه تفداك ننصب ماتمك ننعاك
واجبنه نصيح اليوم نندب آه يا مظلوم
***************
فدوه إلك تروح الروح تصرخ آه يا مذبوح
ليل نهار عليك تنوح قلبها شيعتك مجروح
واجبنه نصيح اليوم نندب آه يا مظلوم
***************
حاج يعقوب القصاب
جمادي الآخر 1431هـ / مايو 2010
جدحفص البحرين